Flest røyrleggjarar og trevaresnikkarar frå Polen har fått godkjenning

Sidan november 2016 har NOKUT motteke 1 000 søknader om godkjenning for fag- og yrkesopplæringar frå utlandet. Av dei som fekk godkjenning, ligg røyrleggjarar og trevaresnikkarar frå Polen på topp.

Publisert den

– Det er flott at så mange har søkt om å få fag- og yrkesopplæringa si godkjent. Personar med ein godkjent kvalifikasjon står sterkare i arbeidslivet, samtidig som arbeidsgivarar kan vere tryggje på det faglege innhaldet i kvalifikasjonen, seier NOKUT-direktør Terje Mørland.

Godkjenningsordninga for utanlandsk fag- og yrkesopplæring blei etablert i november 2016 og omfattar no fem land. Ordninga starta med Polen og Tyskland og blei i november 2017 utvida med dei tre baltiske landa Litauen, Estland og Latvia. 15 ulike yrkeskvalifikasjonar kan godkjennast i ordninga. Ordninga skal gradvis utvidast til å gjelde nye land og kvalifikasjonar.

Utanlandske kvalifikasjonar som er godkjente så langt

  • 90 røyrleggjarar
  • 87 trevaresnikkarar
  • 24 tømrarar
  • 25 murarar
  • 17 kjøttskjerarar
  • 15 møbelsnikkarar
  • 9 frisørar
  • 7 slaktarar
  • 7 betongfagarbeidarar
  • 2 industrimekanikarar
  • 1 pølsemakar
  • 1 butikkslaktar

– 285 kvalifikasjonar er så langt blitt godkjente som sidestilte med norske fag- og sveinebrev. I gjennomsnitt tek det rundt to månader å behandle ein søknad, seier sjef for fagutdanningsseksjonen Silje Molander.

Nyttig samarbeid med partane i arbeidslivet

 – Partane i arbeidslivet har ei sentral rolle i denne godkjenningsordninga. For det første var rolla deira avgjerande for å få etablert ordninga. Vidare har dei ei viktig rolle i arbeidet med å foreslå sakkunnige som kan vurdere det faglege innhaldet av ein utanlandsk yrkeskvalifikasjon, opplyser Molander.

Fakta

Søknaden går gjennom to ledd:

  1. NOKUT vurderer fyrst den formelle statusen til kvalifikasjonen i heimlandet, kven som er ansvarleg styresmakt for opplæringa og kven som gir ut (utsteder) dokumentasjonen. Lengda på opplæringa, mengda med praktisk opplæring og om opplæringa er på nivå tilsvarande norsk fag- og yrkesopplæring på vidaregåande nivå blir vurdert. Her kan NOKUT avvise søknadene.
  2. Dei sakkunnige gjer ei fagleg vurdering av innhaldet i kvalifikasjonen, og dei ser på dugleikar og kompetanse som blir oppnådd samanlikna med norsk fag- og yrkesopplæring. Søknadene blir her anten godkjende eller avslåtte. Eit positivt vedtak inneber at kvalifikasjonen blir sidestilt med tilsvarande norsk kvalifikasjon innan gitt fag- og yrkesopplæring.

Søkjarar som får avslag, får ei fagleg grunngiving på kvifor kvalifikasjonen ikkje kan sidestillast med tilsvarande norsk kvalifikasjon.

Les meir om godkjenning av utanlandsk fag- og yrkesopplæring.

Del med andre