To nye fagområde akkreditert for Fagskolen Oslo og Fagskolen Vestfold og Telemark
Vedtaka inneber at fagskulane no sjølv kan opprette nye utdanningstilbod innan dei akkrediterte fagområda utan å søkje NOKUT i forkant.
NOKUTs styre har vedtatt å akkreditere to nye fagområde innan høgare yrkesfagleg utdanning: Tekniske fag ved Fagskolen Oslo og Teknisk ved Fagskolen Vestfold og Telemark.
– Med desse akkrediteringane blir det tekniske utdanningstilbodet styrkt ytterlegare i to viktige regionar. Begge fagskulane har dokumentert gode strategiar og system for å vidareutvikle fagområda, seier Kristin Vinje, administrerande direktør i NOKUT.
Fagskolen Oslo – Tekniske fag
Fagskolen Oslo får akkreditering for fagområdet Tekniske fag, som omfattar utdanningar retta mot byggfag, elektrofag og scenetekniske fag – inkludert utdanningar i leiing når desse er spesifikt retta mot yrkesutøvarar i dei nemnde fagfelta. Generelle leiingsutdanningar og kreative scenefag er ikkje omfatta av fagområdet.
Les rapporten her: Fagskolen Oslo – Tekniske fag (pdf)
Den sakkunnige komitéen vurderer at Fagskolen Oslo har ein strategi med mål og tiltak for å utvikle fagområdet i tråd med relevante utviklingstrekk, som auka behov for fleksible utdanningar og kompetanse innan berekraft og tverrfaglegheit. Strategien inneheld klare mål for korleis fagskulen vil utvikla fagområdet for å møta desse utfordringane. Fagskulen har også rutinar som vil bidra til å sikra at strategien kan gjennomførast, både når det gjeld økonomisk handlingsrom, infrastruktur og nødvendig kompetanse i fagmiljøet.
Fagskulen skal i løpet av 2025 få nye lokale i "Construction City" som blir bygd på Ulven i Oslo. Her vil skulen samla utdanningane innan tekniske fag. Flyttinga av dei tekniske utdanningane til fagskulen inneber også at fagskulen blir samlokalisert med andre verksemder innan bygg- og anleggsbransjen, og dette kan gi endå betre tilgang til aktuell infrastruktur og relevant kompetanse.
Om Fagskolen Oslo
Fagskolen Oslo er ein offentleg fagskule ått av Oslo kommune. Den har røter tilbake til 1876 og tilbyr i dag utdanningar innan tekniske fag, helse- og oppvekstfag og fag innan leiing. Per mars 2025 har skulen 17 akkrediterte utdanningar, med 10 innan tekniske fag. Ved siste rapportering hausten 2024 hadde fagskulen 974 aktive studentar (607,5 heiltidsekvivalentar).
Fagskolen Vestfold og Telemark – Teknisk
Fagskolen Vestfold og Telemark får akkreditering for fagområdet Teknisk, som omfattar utdanningar innan mellom anna elektro, mekanisk produksjon, prosessindustri, bygg og anlegg, maritim teknologi og IKT innan tekniske fag og velferdsteknologi. Innafor leiing og økonomi kan utdanningar inngå dersom dei er tett knytte til dei tekniske områda, som til dømes prosjektleiing eller byggeplassleiing.
Les rapporten her: Fagskolen Vestfold og Telemark – Teknisk (pdf)
Komitéen anbefalte at fagskulen tydelegare prioriterer tiltak i handlingsplanane for fagområdet, og særleg anbefalte dei å opprette eit fagråd innan elektro for å styrkje fagmiljøet. Likevel blir det vurdert at fagskulen samla sett har tilstrekkelege føresetnadar for å vidareutvikle fagområdet.
Om Fagskulen Vestfold og Telemark
Fagskulen Vestfold og Telemark er ein offentleg fagskule ått av Vestfold og Telemark fylkeskommune. Den blei etablert i 2020 gjennom ein fusjon av Fagskolen Vestfold og Fagskolen Telemark og har studiestadar i Horten, Porsgrunn og Notodden. Per mars 2025 tilbyr fagskulen 33 akkrediterte utdanningar og hadde 1303 aktive studentar (773,73 heiltidsekvivalentar) ved siste rapportering hausten 2024.