Rekordmange tilsynssaker behandla

På det siste styremøte i NOKUT i 2024 blei det behandla åtte saker om tilsyn med systematisk kvalitetsarbeid. Nokon av høgskulane fekk godkjent kvalitetsarbeidet sitt, medan andre har litt eller mykje å retta opp.

Publisert den

Sidan 2003 har NOKUT gjennomført periodiske oppfølgingar av kvalitetsarbeidet ved alle høgskulane og universiteta i Noreg. NOKUTs styre fattar vedtak i desse sakene, og aldri før har det blitt fatta fleire vedtak på eit møte enn på årets siste styremøte.

Av dei i alt åtte sakene var det fem ordinære tilsyn og tre saker der høgskulane tidlegare hadde fått pålegg om å rette opp manglar i kvalitetsarbeidet.

Dei fem ordinære tilsyna er gjennomførte ved Kriminalomsorgens høgskole og utdanningssenter KRUS, Høyskolen for dansekunst, Høgskulen for grøn utvikling, Høyskolen for yrkesfag AS og Steinerhøyskolen.

Opprettingane gjeld  Forsvarets høgskole, Atlantis Medisinske Høgskole og Noroff University College.

At resultatet er fire positive og fire negative vedtak, er ikkje så overraskande, fortel NOKUT-direktør Kristin Vinje.

– Når dei periodiske oppfølgingane våre avdekkjer heile spekteret, frå framifrå kvalitetsarbeid til kvalitetsarbeid der institusjonane har utfordringar med å tilfredsstille krava i loven og forskriftene, viser det at den periodiske oppfølginga fungerer etter hensikta, seier Vinje. Ho understrekar at alle institusjonane er underlagde det same regelverket, og NOKUT si rolle er å forsikre seg om at utdanninga som blir tilboden, tilfredsstiller krava til kvalitet, slik at samfunnet kan ha tillit til norsk høgare utdanning.

– Når det er sagt, har institusjonane stor fridom til å tilpasse kvalitetsarbeidet til storleik og eigenart, så lenge dei tilfredsstiller krava i lov og forskrift, seier Vinje.

NOKUTs tilsyn i perioden 2017–2024 har vore organisert slik at institusjonar med relativt like føresetnader gjennomgår tilsynet samtidig, med eit ønske om samarbeid og erfaringsdeling på tvers av institusjonane. I 2025 startar ein ny runde med periodisk oppfølging, som alle høgskular og universitet i Noreg skal gjennom innan 2033. I denne runden vil kvalitetsutvikling vera ein enda meir sentral del av oppfølginga.

KRUS har kontroll

Ein av institusjonane som har fått godkjent kvalitetsarbeidet sitt på første forsøk, er Kriminalomsorgens høgskole og utdanningssenter KRUS. KRUS fekk skryt av den sakkunnige komiteen for eit godt metodisk og utviklingsorientert arbeid.

– KRUS har vist at ein kan setje seg høge og realistiske mål for kvalitetsarbeidet, utan at systemet i seg sjølv blir for omfattande og arbeidet for tidkrevjande, seier Vinje.

Under følgjer ei oversikt over alle tilsyna, med fakta om institusjonane og nokre vurderingar frå dei sakkunnige komiteane.

Tilsyn med det systematiske kvalitetsarbeidet

  • Tilsynsrapport – Kriminalomsorgens høgskole og utdanningssenter KRUS (pdf)

    Vedtak: tilfredsstillande kvalitetsarbeid

    Kriminalomsorgens høgskole og utdanningssenter KRUS (KRUS) er underlagt Kriminalomsorgsdirektoratet, held til i Lillestrøm og er den einast høgskulen i Noreg som utdannar fengselsbetjentar. Høgskulen tilbyr ei toårig høgskulekandidatutdanning i straffegjennomføring (120 studiepoeng) og eit bachelorpåbyggingsstudium (60 studiepoeng) som saman med fengselsbetjentutdanninga gir bachelorgrad i straffegjennomføring. KRUS tilbyr òg etter- og vidareutdanning for fengselsbetjentar og andre. KRUS har om lag 370 studentar og aspirantar, og dei fleste er på høgskulekandidatutdanninga.

    Komiteen vurderer at KRUS tilfredsstiller alle krav til systematisk kvalitetsarbeid i loven og forskriftene, og at kvalitetsarbeidet legg stor vekt på systematikk, kontinuitet, medverknad og både kontroll og utvikling. Komiteen vurderer at KRUS gjennomfører eit sjeldan godt kvalitetsarbeid og har ein kvalitetskultur som synast gjennomgåande, ambisiøs og godt forankra ved høgskulen som heilskap. Samtidig får KRUS nokre råd til vidareutvikling og forbetring av kvalitetsarbeidet.

  • Tilsynsrapport – Høgskolen for dansekunst (pdf)

    Vedtak: enkelte manglar

    Høgskolen for dansekunst (HFDK) held til i Oslo og tilbyr studieprogrammet bachelor i dansekunst og koreografi, som blei akkreditert av NOKUT i 2015 og hadde det første opptaket sitt våren 2016. Bachelorprogrammet er eit stadbasert fulltidsstudium, og det blir utdanna eitt kull om gongen, med opptak av 9–12 studentar kvart tredje år. Studietilbodet rettar seg mot nyskapande dansekunst og er basert på ein dialogisk og individorientert pedagogikk.

    Komiteen ser mange positive sider ved dei små kulla, den individorienterte og campusbaserte pedagogikken og den tette og daglege kontakten både mellom tilsette og studentar og studentane imellom. Alt dette sikrar fysisk og psykososialt læringsmiljø og dessutan rask og uformell handtering av kvalitetsutfordringar. Likevel har HFDK enkelte manglar å rette opp. HFDK må etablere ei tydeleg strategisk retning for kvalitetsarbeidet og gjennomføre periodiske evalueringar av studietilbodet og systematisk kontroll med krav til akkrediterte studietilbod.

  • Tilsynsrapport – Høgskulen for grøn utvikling (pdf)

    Vedtak: vesentlege manglar

    Høgskulen for grøn utvikling (HGUt) er ein privat høgskule som held til på Bryne og tilbyr studieprogrammet bachelor i nyskaping og regenerativ utvikling og ulike enkeltemne som også inngår i bachelorprogrammet. Undervisinga er samlingsbasert, og dei om lag 30 studentane kan velja mellom fysisk og digital deltaking og mellom å gjennomføra utdanninga på heiltid eller deltid.

    Komiteen vurderer at det systematiske kvalitetsarbeidet ved HGUt har vesentlege manglar, og at høgskulen må gjennom eit nytt tilsyn om eit år. Det er likevel tydeleg at HGUt er god på uformelt og studentnært kvalitetsarbeid. Kvalitetsarbeidet er forankra i institusjonen, og arbeidsmodellen ved høgskulen er utprega demokratisk. Hovudutfordringane ved HGUt er at kvalitetsarbeidet ikkje blir tilstrekkeleg dokumentert, at høgskulen ikkje systematisk kontrollerer at studietilbodet tilfredsstiller krava til akkreditering, og at han enno ikkje har gjennomført periodiske evalueringar av studietilbodet.

  • Tilsynsrapport – Høyskolen for yrkesfag AS (pdf)

    Vedtak: enkelte manglar

    Høyskolen for yrkesfag AS (HØFY) er ein privat høgskule som er eigd av fylkeskommunane Innlandet, Vestfold, Telemark og Buskerud. Hovudsetet ligg i Gjøvik, men HØFY har også studiestad i Porsgrunn. Sidan 2019 har HØFY tilbydd utdanninga bachelor i byggeplassledelse. Studentane tar utdanninga gjennom eit samlingsbasert deltidsløp parallelt med full jobb. HØFY har om lag 130 studentar og tilbyr frå hausten 2024 òg studietilbodet bachelor i ledelse av tekniske og bærekraftige bygningsinstallasjoner.

    Komiteen vurderer at HØFY har enkelte manglar i kvalitetsarbeidet. HØFY må få på plass systematisk kontroll med krav til akkrediterte studietilbod og periodiske evalueringar og dessutan bruke kvalitetssystemet i samanheng med det strategiske rammeverket sitt. Opprettingsfristen er tolv månadar. Det blir viktig for HØFY framover å finna balansen mellom det uformelle og det formelle kvalitetsarbeidet og mellom drift og sikring på den eine sida og vidareutvikling på den andre.

  • Tilsynsrapport – Steinerhøyskolen (pdf)

    Vedtak: enkelte manglar

    Steinerhøyskolen er ein privat høgskule som held til i Oslo. Høgskulen blei etablert i 1981 og tilbyr i dag tre bachelorprogram, eit masterprogram, eit årsstudium og dessutan vidareutdanningar og enkeltemne, alle innanfor fagområdet steinerpedagogikk. Saman med OsloMet tilbyr Steinerhøyskolen òg fellesgraden grunnskolelærerutdanning for trinn 1–7 med steinerpedagogikk på 300 studiepoeng. Hausten 2023 hadde høgskulen 302 studentar.

    Komiteen vurderer at Steinerhøyskolen har enkelte manglar i kvalitetsarbeidet sitt, og konkluderer med at høgskulen må rette opp manglar knytt til to av krava. Steinerhøyskolen får tolv månaders frist til å dokumentera 1) ordningar for systematisk kontroll med krav til akkrediterte studietilbod og 2) oppdaterte retningslinjer for periodiske evalueringar og gjennomførte evalueringar av to av studietilboda.

Tilfredsstillande kvalitetsarbeid etter oppretting

  • Tilsynsrapport – Forsvarets høgskole (pdf)

    Vedtak: tilfredsstillande kvalitetsarbeid

    Forsvarets høgskole (FHS) er ein akkreditert høgskule, men også ei driftseining i Forsvaret. FHS blei oppretta då seks tidlegare høgskular og befalsskulane blei slått saman i 2018. I 2020 blei også Språk- og etterretningsskolen innlemma i FHS. FHS tilbyr akkreditert utdanning i form av bachelorutdanningar i militære studium, språk og etterretning og telematikk, eit årsstudium i militær leiing og operasjonar, ein erfaringsbasert masterutdanning i militære studium og vidareutdanningsemne i nasjonal beredskap og krisehandtering, etterretning og samfunnstryggleik.

    NOKUT gjennomførte tilsyn ved FHS våren 2022, og i oktober same år fatta NOKUTs styre vedtak om at det systematiske kvalitetsarbeidet hadde enkelte manglar. Komiteen så alvorleg på den høge arbeidsbelastinga i enkelte av bachelorprogramma ved FHS, ei problemstilling FHS hadde vore klar over i fleire år, men ikkje klart å ta tak i. Komiteen meiner at FHS har gjennomført eit stort arbeid i opprettingsperioden, med mellom anna grundige analysar i kvalitetsrapporten og nytt avvikshandteringssystem. FHS har likevel brukt urimeleg lang tid på å rette opp avviket med stor arbeidsbelasting, og komiteen meiner at FHS framleis ikkje har kome heilt i mål med arbeidet. Komiteen vurderer at FHS no tilfredsstiller alle dei formelle krava til kvalitetsarbeid, men tilrår NOKUT å følgje opp høgskulen før den neste periodiske oppfølginga.

  • Tilsynsrapport – Atlantis Medisinske Høgskole (pdf)

    Vedtak: tilfredsstillande kvalitetsarbeid

    Atlantis Medisinske Høgskole (AMH) er ein privat høgskule organisert som eit aksjeselskap eigd av Atlantis Holding. Drifta blir finansiert gjennom skulepengar, og AMH tilbyr studium i Oslo, i Málaga og over nett. I 2022 hadde AMH rundt 160 studentar. AMH har akkrediterte bachelorutdanningar, årsstudium og halvårsstudium innan fagfelta medisin, ernæring, psykologi og dessutan anatomi og fysiologi, men ikkje alle studietilboda i porteføljen er aktive.  

    NOKUT gjennomførte tilsyn med kvalitetsarbeidet ved AMH våren 2023, og NOKUTs styre fatta vedtak om enkelte manglar i oktober same år. AMH fekk åtte månaders frist til å rette opp i manglane. Etter å ha vurdert dokumentasjonen på oppretting ser komiteen at AMH har kome i gang med å rette opp, og dei formelle minstekrava til kvalitetsarbeid er vurderte som oppfylte. Når det er sagt, er komiteen bekymra over resultata som har kome fram mellom anna i den periodiske evalueringa av bachelor i medisin, og dei sakkunnige anbefaler NOKUT å gjennomføre tilsyn med eitt eller fleire av AMH sine studietilbod.

  • Tilsynsrapport – Noroff University College (pdf)

    Vedtak: tilfredsstillande kvalitetsarbeid

    Noroff University College (NUC) blei etablert i 2012 og er eit aksjeselskap med eige styre og samtidig ein del av Noroff School of Technology and Digital Media, som òg tilbyr mellom anna fagskuleutdanning. NUC tilbyr i alt fem bachelorprogram i Kristiansand, i Oslo og som nettstudium. Hausten 2022 var det i underkant av 600 studentar ved NUC, og om lag 450 var nettstudentar.

    NOKUT førte tilsyn med NUC sitt kvalitetsarbeid våren 2023, og NOKUTs styre fatta vedtak om enkelte manglar i oktober same år. NUC fekk åtte månaders frist til å rette opp i manglane, som var knytte til dokumentasjon av arbeidet med læringsmiljø og systematisk kontroll med krav til akkrediterte studietilbod. Etter å ha vurdert dokumentasjonen på oppretting konkluderer komiteen med at NUC no tilfredsstiller alle krava til systematisk kvalitetsarbeid. Dei sakkunnige anerkjenner innsatsen som er lagd ned i arbeidet med å rette opp manglane, men anbefaler NUC å vurdera forenklingar i kvalitetssystemet, i kvalitetsarbeidet og i ordninga for systematisk kontroll.

Del med andre